Please update your Flash Player to view content.
English (United Kingdom)
Home

     WhatsApp_Image_2017-12-06_at_11.05.21ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ຮ່ວມກັບ ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອ​ຊ) ແລະ ສະ​ພາ​ການ​ຄ້າ ແລະ ​ອຸດ​ສາ​ຫະ​ກຳ ແຂວງ​ຫຼວງພະບາງ ໄດ້ຈັດກອງປະຊຸມປຶກສາຫາລືລະຫວ່າງ ຂະ​ແໜງ​ການ​ທີ່​ກ່ຽວ​ຂ້ອງ ​ຂອງພາກລັດ ແລະ ໜ່ວຍງານປຶກສາຫາລືພາກທຸລະກິດ ຫຼວງພະບາງ ຂຶ້ນ ໂດຍ ການເປັນປະທານຮ່ວມຂອງທ່ານ ​ພູ​ວຽງ​ ​ພົງ​ສາ, ​ຮອງຫົວໜ້າກົມແຜນການ ແລະ ການຮ່ວມມື, ກະ​ຊວງ​ອຸດ​ສາ​ຫະ​ກຳ ແລະ ​ການ​ຄ້າ,  ທ່ານ ຄໍາຕັນ ສົມພັນວິໄລ ​ຮອງ ຫົວ​ໜ້າ​ພະ​ແນກ​ອຸດ​ສາ​ຫະ​ກຳ ແລະ​ການ​ຄ້າ ແຂວງຫຼວງພະບາງ, ທ່ານ ບຸນທ່ຽງ ສຸລິວັນ ປະທານສະພາການຄ້າ ແລະ ອຸດສາຫະກໍາ ຫຼວງພະບາງ, ແລະ ​ທ່ານ ພູ​ໄຊ ເທບ​ພະ​ວົງ​, ເລ​ຂາ​ທິ​ການ ສ​ຄອ​ຊ ແລະ ມີບັນດາຜູ້ເຂົ້າຮ່ວມກໍ່ຄືຕາງໜ້າພາກລັດທີ່ກ່ຽວຂ້ອງ ແລະ ພາກທຸລະກິດ ແຂວງ​ຫຼວງພະບາງ ເຂົ້າຮ່ວມຢ່າງຟົດຟື້ນ. ຈຸດປະສົງຂອງກອງປະຊຸມ ແມ່ນເພື່ອເປີດໂອກາດໃຫ້ຕົວແທນໜ່ວຍງານປຶກສາຫາລືພາກທຸລະກິດ ແລະ ບັນດາສະມາຊິກ ໂດຍ​ສະ​ເພາະ ແມ່ນ ຈາກ ຂະ​ແໜງ​ທ່ອງ​ທ່ຽວ ແລະ ຂະ​ແໜງ​ຫັດຖະກໍາ ​ແຂວງ​ຫຼວງພະບາງ ໄດ້ຮ່ວມປຶກສາຫາລືກັບໜ່ວຍງານທີ່ກ່ຽວຂ້ອງຂອງລັດຖະບານ ເພື່ອຄົ້ນຄວ້າ ແລະ ແກ້ໄຂ ບັນຫາ ຫຼື ຂໍ້ຂ້ອງໃຈທີ່ພາກທຸລະກິດຍົກຂຶ້ນ ເພື່ອລາຍງານຕໍ່ກອງປະຊຸມທຸລະກິດລາວຄັ້ງທີ11 ທີ່ຄາດ​ວ່າ​ຈະ​ຖືກ​ຈັດ​ຂຶ້ນ ໃນ​ເດືອນ ມີ​ນາ 2018.

     ທ່ານ ​ປະ​ທານ ສ​ຄອ ຫຼວງພະບາງ ​ຍັງໄດ້ກ່າວວ່າ: ປະຈຸບັນນີ້ ການແຂ່ງຂັນໃນທາງທຸລະກິດໃນຂົງເຂດ ແລະ ໃນສາກົນ ແມ່ນມີທັງທາງດ້ານການ ຜະລິດ, ການຍາດແຍ່ງຕະຫຼາດຈໍາໜ່າຍ, ການຍາດແຍ່ງຕະຫຼາດບໍລິການ, ການນໍາໃຊ້ເຕັກໂນໂລຊີທີ່ລ້ຳໜ້າ-ທັນສະໄໝ ແລະ ການນຳໃຊ້ນະວັດຕະກໍາໃໝ່ໆ ທີ່ເປັນມິດກັບສິ່ງແວດລ້ອມ.  ທັງໝົດທີ່ກ່າວມານີ້ ໄດ້ກາຍເປັນສິ່ງທ້າທາຍໃຫ້ແກ່ ພາກທຸລະກິດ ໃນ ສປປ. ລາວ. ແລະ ນັກທຸລະກິດ ໃນຂະແໜງການ​ທ່ອງ​ທ່ຽວ ແລະ ຫັດຖະກໍາ ແຂວງ​ຫຼວງພະບາງ ກໍ່ຈເປັນຕ້ອງໄດ້ຍົກລະດັບ ພ້ອມທັງຄຸນນະພາບຂອງການບໍລິການຂອງຕົນ ໃຫ້ເປັນທີ່ເປັນທີ່ຍອມຮັບໄດ້ຂອງຕະຫຼາດ ຢ່າງຮີບດ່ວນ!. ແຕ່ ທັງນີ້ທັງນັ້ນ ສິ່ງທີ່ເປັນອຸປະສັກອື່ນໆກໍ່ຍັງແມ່ນການຈັດຕັ້ງປະຕິບັດລະບຽບກົດໝາຍ, ຂັ້ນຕອນການຍື່ນເອກະສານ, ຂັ້ນຕອນການເຂົ້າຫາແຫຼ່ງທຶນ, ການຂາດແຄນແຮງງານທີ່ມີສີມື, ການຂາດແຄນແຮງງານທົ່ວໄປ  ແລະ ອື່ນໆ. ທຸກພາກສ່ວນຈຶ່ງຈຳເປັນຕ້ອງໄດ້ຊອກຫາວິທີແກ້ໄຂຮ່ວມກັນ ເພື່ອໃຫ້ຄ່າໃຊ້ຈ່າຍຕົ້ນທຶນການຜະຫຼິດໃຫ້ຕໍ່າລົງກວ່າແຕ່ກ່ອນ. ນອກຈາກນີ້ ຜູ່ເຂົ້າຮ່ວມກອງປະຊຸມກໍ່ຄືພາກທຸລະກິດ ຕາງໜ້າ   ໜ່ວຍງານປຶກສາຫາລືຂະແໜງທ່ອງ​ທ່ຽວ ແລະ​ຫັດຖະກຳ ກໍ່ໄດ້ຮ່ວມກັນສະເໜີບັນຫາທີ່ພົບພໍ້ໃນການດຳເນີນທຸລະກິດ ເປັນຕົ້ນແມ່ນ ບັນຫາ ຂະ​ແໜງ​ຫັດ​ຖະ​ກຳ ແຜ່ນ​ແພ ແລະ ປໍ​ສາ ຂາດ​ຄວາມ​ຮູ້​ດ້ານ​ການ​ອອກ​ແບບ, ການເຂົ້າຫາຕະຫຼາດ ແລະ​ການ​ແຂ່ງ​ຂັນ​ຈາກ​ທຸ​ລະ​ກິດ ຂາຍ​ຍົກ​ ຂາຍ​ຍ່ອຍ​ຂອງ​ຊາວ​ຕ່າງ​ປະ​ເທດ, ການ​ເຂົ້າ​ຫາ​ແຫຼ່ງ​ທຶນ ຂອງ​ຜູ້​ປະ​ກອບ​ການ​ຂະ​ໜາດ​ນ້ອຍ, ການ​ສົ່ງ​ເສີມ ແລະ ໂຄສະນາການທ່ອງທ່ຽວ, ການບູລະນະແຫຼ່ງທ່ອງທ່ຽວ ແລະໂຄງ​ລ່າງ​ພື້ນ​ຖານ, ລະບຽບການຄຸ້ມຄອງທຸລະກິດນຳທ່ຽວ, ຄຸນ​ນະ​ພາບ​ການບໍລິການດ້ານສາທາລະນະສຸກ, ເຊິ່ງຂະແໜງການທີ່ກ່ຽວຂ້ອງຂອງລັດຖະບານກໍໄດ້ປະກອບຄຳຄິດຄຳເຫັນຢ່າງກົງໄປກົງມາ ແລະ ຮັບເອົາບັນຫາທີ່ພາກທຸລະກິດສະເໜີໄປຄົ້ນຄວ້າຕື່ມເພື່ອຊອກຫາວິທີແກ້ໄຂຮ່ວມກັນຢ່າງມີປະສິດຕິຜົນ ແລະເພື່ອເຮັດໃຫ້ສະພາບແວດລ້ອມການດໍາເນີນທຸລະກິດໃນ ແຂວງ​ຫຼວງພະບາງ  ກໍ່​ຄື ໃນ ສປປ ລາວ ມີຄວາມຍຸດຕິທໍາ, ໂປ່ງໃສ, ເປັນເອກະພາບກັນ , ມີຂັ້ນຕອນທີ່ສະດວກ ແລະຊັດເຈນຂຶ້ນ, ແລະມີຄ່າໃຊ້ຈ່າຍທີ່ໜ້ອຍລົງ.

WhatsApp_Image_2017-12-06_at_11.05.21